لسة لسة

أيام سودة وقمع وضرب
وفضايح شرق وغرب
خسة وضعة وحالة حرب
وبكرة يقولوا جه بانتخابات

لسة لسة ده من الغيث أوله
وانتخابات الرياسة هتيجي تكمله
وساعتها هتقولوا وتهللوا
فين أيام الاستفتاءات

حزن حزن وبرضه هنقول لا
الثمن لازم يندفع لمنتهاه
الحرية مش هدية من الطغاة
دي أبية ما تلينش إلا بالعناد

قولوا للحكومة المفترية
إللي هتخلي كل الشهور سبتمبرية
امتى نهاية المسرحية
ولا تزوير للممات؟

كل واحد بيطلع عالمعاش
أو بينتهى ملفوف بمترين قماش
ليه بتحس بالاندهاش
لما يحكولك عالسادات؟

اقروا التاريخ يمكن تاخدوا عباير
ماللي حصل في زمان مغاير – ومش مغاير
ساعة رحيلكوا هتهل البشاير
ويملا الفرح المدونات

آخر آخر لازم جي
طول ما لساننا فينا حي
ورحيلكم قدامنا ضي
مش هنمشي من سكات

قولوا له وآله وقولوا كمان
طالب الحرية مش جبان
ولا هنطلبها باستئذان
ولا هنسيبها بالهراوات

اسمع صوت الناس والكفاية
ادي السلم فرصة كفاية
مش عايزين دم بقى كفاية
ولا أكتوبر ولا اغتيالات

مش دايماً صوت الفرح موسيقا
مش دايماً صوت الفتح موسيقا
مش دايماً صوت الصبح موسيقا
ساعات بيكون صوت الكلبشات

بدأت سكة وخلصت سكة
زيحوا إللي واقفين في السكة
حتى إن قاموا وقامت عركة
هنخسر أكتر ماللي فات؟

مش عايز أسيح نقطة دم
مش عايز ألوث إيدي بدم
مش عايز أشوف قدامي الدم
مش عايز إلا الحريات

عصيان مدني عصيان سلمي
يا ريت تعرفي معناها يا أمي
وتعصي وتشيلي عني همي
وتعرفي قوة السكات

عصيان سلمي جوة في بلدي
طريق وواقف في آخره غاندي
حتى دمكوا غالي عندي
وإن كنت أنا أرخص الحاجات

عصيان سلمي مش ضعيف
سلمي يعني رفض شريف
من غير دم لكنه مخيف
لما بيرفض في ثبات

تقدر تضرب يعني إيه؟
قدام عصياننا هتعمل إيه؟
هتقول للساكت ساكت ليه؟
ولا تعاقبنا على السكات؟