يمكن بكرة

يمكن في وقت تاني
كنا ملينا بالحب المدونات
واتكلمنا عن العشق
والحكايات
والبنات اتغزلوا في الولاد
والولاد التغزلوا في البنات
كنا كتبنا عن انفتاح الحياة
قدامنا زي البساط
لكن في ناس خلت كل المدونات
حزن ونكد
وهم وكمد
وناس بتصرخ بكل اللغات
كل ما نقول مصيبة وعدت
تيجي مصيبة أسوأ ماللي فات
بطلنا حتى نعد النكبات
عياط وعيطنا
صويت وصوتنا
لطم ولطمنا
وفالاخر ما فضلش إلا شوية كتابات
واحد بيشكي من البوليس
وواحد بيلعن في الرئيس
وواحد شدوه مالقميص
وعروا بنت من البنات
وعاطل بيشكي للزمن
وماركسي بيعيط عالوطن
شكوى في السر والعلن
وحداد أعلنوه الأمهات
شعر عشق ما تلاقيش
كلام في الحب مافيش
حب وقت الحرب؟ ما تجيش
واللي نصبح فيه، فيه نبات
شوية حزن ومسحة فلسفة
شوية زعيق من ناس متكتفة
لحكام فاسدة وفلوسها متستفة
وريحتها فايحة في البلاد

يا ناس يا هووه

حاكموه

إللي خللى جيل شباب

بحاله

عنده اكتئاب