الاثنين، مايو ٢٣، ٢٠٠٥

تحت الخيمة السودا

فتاتي العزيزة: هذه الطرحة التي تضعينها على رأسك لا تغير من الأمر شيئاً، فالرجال -أولئك الأوغاد - قلما ترتفع أنظارهم إلى مثل تلك الأماكن العالية
الكاتب الساخر محمد عفيفي

هذه الكلمات من وحي المشرحة، حيث جلست أمامي مجموعة من الفتيات بأنواع مختلفة من الأغطية المحكمة، وعلى طاولة التشريح سجي باهمال عارياً ذلك الجسد الذي اتخذوا لأجله كل هذه الاجراءات الوقائية

تحت الخيمة السودا
بنت عادية
خايفة من كل الولاد المعدية
بنت زي كل البنات
عايزة تتجوز
وتجيب ولاد
وتحقق الرسالة الأبدية
تحت الخيمة السودا
بنت مستخبية
من كل حاجة في الدنيا
من العيون لتتجسس عليها
من الهوا ليلمس إيديها
بس في الآخر بنت عادية
زي كل البنات المستخبية
خايفة تخبط
يطلعلها من ورا الباب عفريت
خايفة تبص من الشباك
من ورا السور الحديد
لحسن تشوف الدنيا الجريئة
إللي كل حاجة فيها
بتهددها بالعار والخطيئة
ومن الناحية دية
هي بنت زي كل البنات
بنت عادية
فيه بنات بتستخبى
ورا النقاب
وفيه بنات بتستخبى ورا الحجاب
وبنات تحت خيمة سودا
وبنات ورا الأبواب
وكلهم بنات عادية
بيخافوا الريح تبين
خصلة من شعرهم
أو وسط الأغراب
تبان حتة من جسمهم
غير إللي عنها قالهم
رجل بعمة ودقن
وقالها ربنا قال
في الإنجيل
أو القرآن
أو التوراة
أو أي كتاب صدر
لأي واحد مالبشر
بيقول أي حاجة
إلههم قاعد في سماه
يبص يشوف
إيه مداري وإيه مكشوف
المهم في النهاية
كل بنت من البنات
فيها حاجة أو حاجات
لازم تتستر
وفي حالة الشك
وحالة المثالية
تستخبى تحت خيمة سودا
أو طرحة بيضا
أو غطا من أي لون
أو غلاف من الحذر
من كل البشر
لكن للأسف
بعد كل دا السخف
مش ممكن أي بنت
تكون بنت عادية
إنما انسان شايل ذنوب أبدية
عملها ما عملهاش
مش دي القضية
ما دام الجنس أنثى
تبقى الخطيئة مستنية
فتنة بلغة
وعثرة بلغة
وعورة بلغة
وحتى اللغات الأجنبية
ولا يمكن بنت شايلة
كل ده فوق كتافها
نقول عليها بنت عادية
البنت العادية
فاتحة صدرها للهوا والنور
سايبة الشمس تقتل
كل ميكروبات الجهل
إللي معششة من أول العصور
بتتمرغ في رمل الصحرا
وجسمها بيحضن مية البحر
وهوا الفجر
بتدوق طعمه على مهل
وتشمر من غير خجل
هدومها للعمل
واللعب
وإيديها تتعفر
وشعرها يتنكش
وما بتحرصش من الهوا
على هدومها
بالعند في أبو جهل
وتدبدب برجليها ساعة الغضب
وتتمايل على نغمة طرب
وما تعرفش يعني إيه
الأب هو العصب
وشرفها في الدماغ
مش فوق الركب
لكن البنت إللي تحت الخيمة السودا
أو الطرحة البيضا
أو أي ماركة من الهدوم؟؟؟!
هأغير أول القصيدة
تحت الخيمة السودا
تحت الطرحة الوردي
وتحت كل الستور
بنت مش عادية
انسانة مش عادية
محرومة من الانسانية

4 Comments:

Blogger African Doctor said...

رائعة يا سقراط
هل تصدق أن خواطر مشابهة تدور في ذهني كلما أرى نفس المنظر
لكن تعبيرك عنه جميل

الأربعاء, مايو ٢٥, ٢٠٠٥ ١٢:٤٦:٠٠ م  
Anonymous غير معرف said...

ya 3am sokrat anna 3andy so2al
ta7t el khaimah feih 3o2oul ? walla gowa el 3a2l... khemah ???

3ashan law gowa el 3e2oul..kheyam...meansouba....
yeb2a 3aleiha el salam...

kheyam el 3e2oul...mabetfara2 welad aw banat

kheyam fel 3e2oul mansouba... feiha nakka we gamal we sa7ara we zaman 3'eir el zaman...we afkar 3afa 3aleiha el zaman

mabakhafsh men kheimah ta7taha 3a2oul... bakhaf men 3a2al gowa el khema betedefan....

الأربعاء, مايو ٢٥, ٢٠٠٥ ٢:٣٤:٠٠ م  
Anonymous غير معرف said...

VERY VERY Pretty, I wrote something like that before having the same meanings but not that pretty, it made me feel very good knowing that a voice came out to say what I felt but couldn't get out on papers the way I wanted!!!
Wonderful job :-)

الثلاثاء, يوليو ١٢, ٢٠٠٥ ١٠:٢٤:٠٠ ص  
Blogger سما احمد said...

شركة شفط بيارات جنوب الرياض
شركة تنظيف قصور بالرياض
شركة تنظيف قصور شرق الرياض
شركة تنظيف قصور شمال الرياض
شركة تنظيف قصور غرب الرياض

السبت, يوليو ٢٥, ٢٠١٥ ٤:٤٣:٠٠ م  

إرسال تعليق

<< Home

<
eXTReMe Tracker
Office Depot Coupon Codes
Office Depot Coupon Codes