شايفني؟

بالأمس حلمت بكَ

وكنت من غير نضارات

كنت شايف كل حاجة بوضوح

كنت بتشتري حاجات من المحلات وما بتقربهاش من عينيك قوي عشان تقدر تشوف تفاصيلها

ولا بتغير اتجاهها عشان الضوء

وكنت شايف الألوان

قليل ما بتصرح إنت شايف إيه ومش شايف إيه

وبتبص للحياة كإنك شايفها

قليل ما سمعتك ساخط أو بتتبرم على انحسار عدد الحاجات إل بتقدر تشوفها

كنت بتخسر من غير ما تشتكي

مش عارفة ليه كل حاجة صغيرة بقت بتفكرني إنها برة حياتك ... لإنك خلاص مش قادر تشوفها

بقيت ساخطة على كروت التلفون إل بيكتبوا عليها الأرقام بأحجام ميكروسكوبية

والجرايد

وترجمة الأفلام الأجنبية

وعلب الأكل

وشرايط الدوا

بقيت بأتضايق من الحاجات "الصغيرة"

استمريت تقرا لغاية ما الحروف اتحولت لخط واحد طويل

فضلت تكتب بخط كبير مدة طويلة لغاية ما ده كمان بقى انعكاسات مبهمة

بتبص على الحاجات وتقول: "حلوة" ومش بأعرف إيه إل إنت شايفه أو مش شايفه

على أي حال .. كفاية إنك شايفها: "حلوة" ..

يا ترى إنت شايفني؟

خايفة أقولك "اوصفني" ألقاك بتوصف واحدة تانية "حلوة"