الاثنين، نوفمبر 07، 2005

أهمية أن يكون عبد الكريم


هل كان مهماً أن يكون المدون المعتقل هو عبد الكريم نبيل سليمان؟
ألم يكن ممكناً أن تشاء الأقدار أن يكون أي مدون آخر دبلوماسي وذكي ومحبوب عموماً فنتفرغ لتأييده ودعمه ولا تكون مناقشاتنا: هو بيكتب فكر ولا مش بيكتب فكر؟ وكأن هناك جريمة عقوبتها الشرعية: التعذيب في أمن الدولة!! ا
كان الشامتون سيستحون من إظهار شماتتهم ويحفظون نارها في قلوبهم أو بينهم وبين بعض ... ربما
ما كانت أمن الدولة ستنال "احتراماً" ذكره أكثر من شخص في تعليقاته، وهناك من لم يحترمها فحسب، بل أحبها أيضاً!! ا
كانت المعلقة عند واحدة مصرية ستفكر قبل أن تقول أن بعض التأديب لا يضر أحداً
(يدور في خلدى العشرين ألف معتقل الذي قبض على بعضهم في قضايا عنف، عنف مش فكر ولا مش فكر، ترى أينفع بعض التأديب هنا أيضاً؟ ما جدوى معاركنا مع الآخرين لاقناعهم أن الدفاع عنهم لا علاقة له بما ارتكبوه؟ وأن حقهم كبني آدمين هو العدل والعرض على القاضي الطبيعي؟)
ولهذا... كان مهماً أن يكون عبد الكريم
حتى تظهر كل المشاعر عارية ... كدة على حقيقتها
من يخشون أن يصنع منه أمن الدولة بطلاً وهو ما يستاهلش
ومن يعلنون جهاراً إنه يستاهل
والمتشفون علانية فيما يحتمل أن يتعرض له من تعذيب – ربما تسمع نبرة تمني في كتابتهم – وليس في القبض عليه فحسب
وحقيقتنا: أننا لسنا - كمدونين - على الحياد في قضايا حقوق الانسان كما يبدو، كلا كلا، نحن ندافع عن من "لا يستاهل" ومن "يستاهل" ندافع عنها لئلا يصنع منها المعتقل بطلاً وتبقى مصيبة
مدونون يتحدثون عن "الخط الأحمر الذي لا يجب تجاوزه في فضاء تشدق الغالبية بحريته"
كان لابد أن يكون عبد الكريم
حتى نعرف جزء من حقيقتنا مكشوفاً أمام أنفسنا
وبالمرة نعرف مين مع مين فين بيعملوا إيه

الحرية لعبد الكريم الآن

9 Comments:

Anonymous Alaa said...

حلوة مين مع مين فين بيعملوا ايه دي، مين علمهالك؟ و يا ترى في كام حد فهمها؟ و هل نسبة من يدعم عبد الكريم في اللي فاهمينها مختلفة عن نسبتهم في اللي مش فاهمينها؟

و ملكيش نصيب في البازوكا بقى

الثلاثاء, نوفمبر 08, 2005 5:06:00 ص  
Anonymous غير معرف said...

the best article ever (by the way I HAVE DONE BADIN THE EXAM)

الثلاثاء, نوفمبر 08, 2005 1:07:00 م  
Blogger wa7ed mn masr said...

سقراط : أنا ممكن أفهم الناس اللى شمتانة أو فرحانة فى عبد الكريم لأن دول خلفياتهم و طريقة تفكيرهم معروفة ، لكن اللى محيرنى حكاية "من يخشون أن يصنع منه أمن الدولة بطلاً وهو ما يستاهلش" ،يعنى دول عايزينه يطلع علشان مايبقاش بطل ولا عايزينه يتحبس و مايبقاش بطل ولا عايزينه يطلع و مايبقاش بطل ، يعنى هو اللى بيبقى بطل ده بياخد إيه بالظبط علشان يبقى فيه ناس زعلانة أوى من الحكاية دى و هل لو بقى بطل هنلاقى مدونين عايزين يُعتقلوا علشان يبقوا أبطال ، و النبى لو عرفتى دول مين و مع مين و على مين إبقى قوليلى

الثلاثاء, نوفمبر 08, 2005 7:15:00 م  
Blogger haisam (jarelkamar) said...

العزيزه سقراط .. انا من الناس اللي قالوا مش عايزيين عبد الكريم يكون بطل
..
بس ده ما يمنعش ابدا اني اتضامن معاه و اتحرك عشان حريته
..
مش عارف انا ليه حاسس ان في خلط جامد .. طبعا انا ضد اي حد يقول انه يستاهل .. دي قمة القذاره .. هو ما يستاهلش .. زي بالظبط ما معتقلي الاخوان ما يستاهلوض.. بس ده ما يفسرش اني اعمل من الاخواني بطل مثلا .. لمجرد انه معتقل

نفس منطق اعتقال صدام .. مثلا .. انا ادافع عن حقه في التمثيل بواسطه محامي و محاكمته عن طريق محكمه محايده و في جو اقل عدائيه
..
بس ده ما يعنيش ابدا اني اعتبره بطل لانه اتمسك بواسطه الامريكان .. عامة دي ادمغه و اراء شخصيه بحته ..


طيعا رايي لن يغير شيئا من موقفي و لن يهم احدا ابدا و ليس من شان احد مساءلتي فيه
..


كل الموضوع هو تحديد مواقف و وضع النقط على الحروف.. و هذه ليست جريمه
..
انا مع اطلاق سراح كريم للنهايه .. و برضه ضد اعتقال اي انسان لاي سبب بدون قانون او محاكمه عادله اظن جي ثوابت كلنا متفقين عليها ..
و زي ما قال ميلاد في مدونته .. انا متضامن معاه لانه معتقل اعتقال غير قانوني . و قضيته قضية حقوق انسان ..

رايي الشخصي ان اي شماته او تقاعس بسبب اختلاف مواقف .. هي الكراهيه بعينها
..

الثلاثاء, نوفمبر 08, 2005 11:49:00 م  
Blogger أنا said...

عارف ساعات كتير بحب اقرا ومعلقش وخصوصا في الموضيع اللي ذي دية بصراحة مكنتش حابب اني او صفحتي نرتبط بالحدوته دية لكن عجبتني نظرية صناعة البطل اللي اتطرحة دلوقتي
طبعا مش جديدة وبتجاوب برده علي سؤالك في الاول ليه ميكنش مدون ذكي ومحبوب!!؟
صح ..ليه كان عبد الكريم
انا شخصيا معرفش ومش قادر افهم ايه التهديد اللي بيمثله اكتر من الاستفزاز
لكن اللي اعرفه كويس ان الحاجات ديه بتتنسي مع الزمن ومبيفتكرهاش غير اصحابها وهما بيحكوها لصحابهم علي القهوة
واخونا اللي بيدوروا علي اي جنازة علشان يفرغوا فيها الكبت اللي عايشينه قال يعني بيساعدو
::::::
طبعا انا مجبتش سيرة حرية التعبير وان كان المفروض ندافع عنه ولا لأ انا بتكلم فيحاجة تانية خالص
سلام

الأربعاء, نوفمبر 09, 2005 5:58:00 م  
Blogger Socrates said...

علاء: مين مع مين فين بيعملوا إيه دي لعبة قديمة، كنا بنلعبها في الطفولة

إيه موضوع البازوكا؟

المعلق المجهول: امتحان إيه؟

واحد من مصر: مين مع مين بقت واضحة، ولسة بتوضح كل يوم

هيثم: فيه فرق بين إننا نبقى فاهمين إنه "إللي بيصنع البطل" شيء مختلف تماماً عن مجرد اعتقاله، وإنه حتى لو لأسباب اجتماعية أعتبروه بطل لمجرد إنه اعتقل فده لا يعني إنه بطل
تعرضك للظلم لا يصنع منك بطلاً، يصنع منك ضحية فحسب
وبين إن هدفنا من دعمه هو خوفنا أن يصبح بطلاً، وليس كونه بني آدم

مجاهد: أعذرني ما فهمتش قصدك بوضوح ممكن توضحهولي أكتر؟

الأربعاء, نوفمبر 09, 2005 10:27:00 م  
Blogger Ahmed Shokeir said...

واحد من مصر بيقول

أنا ممكن أفهم الناس اللى شمتانة أو فرحانة فى عبد الكريم لأن دول خلفياتهم و طريقة تفكيرهم معروفة

ممكن يوضح أكتر إيه اللى يقصده .. أة يكتب بوست عنده يوضح فيه

غير كده .. تحليلك رائع وعجبنى جدا ياسقراط

الجمعة, نوفمبر 11, 2005 1:35:00 ص  
Anonymous غير معرف said...

I AGREE WITH U WA7D MN MASR THAT VERY REALISTIC NOWADAYS IN THE EGYPTIAN SICK SOCIETY

الجمعة, نوفمبر 11, 2005 2:18:00 ص  
Blogger ايمان said...

القبض علي احد المدونين ليس بالشيء غير المتوقع، مني علي الاقل، فمنذ البداية و أنا اتوجس هذا الفعل، تماما مثل سكان المناطق المنكوبة بالزلازل و البراكين، يعرفون حتمية حدوثها، و لا يعرفون توقيتها، لا و لم اندهش من الفعل المتوقع ، سواء كانت الذريعة ازدراء الأديان أو الذات الملكية، خاصة من اشخاص غير محصنين بشهرة او انتشار صحفي او انتماء حزبي أو جماعي، القضية الحقيقية اننا كمدونين ناس ليس لهم (دية)و حتي من لهم دية معروفة في منطقتنا العزيزة يقتل (اللي تعرف ديته اقتله) فما بالكم بمن ليس له هذه الدية المنيعة، عبد الكريم ، عبد العزيز، عبد الغفور، ستتعدد الاسماء و سيبقي التوقيف و الأعتقال واحدا، فماذا سنفعل؟؟ و كيف إذا تم التوقيف لشخص و لم يُعرف أنه مقبوض عليه من أصله

السبت, نوفمبر 12, 2005 12:59:00 م  

إرسال تعليق

<< Home

<
eXTReMe Tracker
Office Depot Coupon Codes
Office Depot Coupon Codes