الاثنين، يناير ١٦، ٢٠٠٦

بلوجر ودروبال راسين في الحلال

في محاولة لتحسين العلاقات بين بلوجر ودروبال تطوع مدون و مدونة لربط أواصر الود والمحبة، ويأتي هذا للاعلان رسمياً عن انتهاء الحرب الطويلة بين المملكتين بحاجة بسيطة خالص: دبلتين ونص مملكة دروبال

وإحنا طبعاً في بلوجر لم نوافق بسهولة على
المدون الدروبالي إلا بعد أن سألنا عليه وتأكدنا إنه طيب وأمير، خاصة وإن المدونة البلوجرية مش أي حد، و سألناه عنده كام "بايت" وكام "رام" وكام "تدوينة" وبالرغم من انبهارنا بالأرقام مددنا شفاهنا وقلنا: "مش بطال"، معلش التقل صنعة!

ونتمنى أن تؤدي هذه الخطبة السعيدة لوقف كل أشكال الحرب الكلامية والتكنولوجية بين بلوجر ودروبال، إكراماً لمجهودات العصفورين المتحابين، يا رب لا تكفا أبداً عن الزقزقة!

المدون الدروبالي المذكور أعلاه "معرفة قديمة"، نهنأه من كل القلب، وننبأه أن التاريخ السيبري سيذكر له مجهوداته السياسية والتكتيكية في وقف الحرب بين بلوجر ودروبال

والمدونة البلوجرية طبعاً غنية عن التعريف، ويارب ما تسيبناش وتعزل دروبال عشان من لقى أحبابه

وعليه فقد بدأ التدوين في أداء مهمة جديدة: توفيق راسين في الحلال، يارب مفرحنا كدة على طول ويبقى زيتنا في دقيقنا
التدوين ده مش هيبطل يعملنا مفاجآت

حد بقى بيعرف يزغرد؟

18 Comments:

Blogger beastboy said...

حلوة قوي الحكاية دي، المجتمع الافتراضي بقى حق وحقيقي، حاج لذيذة جدًا

الاثنين, يناير ١٦, ٢٠٠٦ ٧:٣١:٠٠ م  
Blogger radwa osama said...

حلو قوى البوست ده ..دمه خفيف يا جين

الاثنين, يناير ١٦, ٢٠٠٦ ٩:٣١:٠٠ م  
Blogger MaLek said...


البقاء لله يا عزبي يا اخويا مكنش يومك والله
والله انا اول ماشوفته قلت شاب كويس ولينوكساوي قد الدنيا
ايه بس اللي حيرميه في سكة الجواز واللي يروح ميرجعش دي
حد يعقله يا جماعه قبل ما تقع الفاس في الراس ويتحدد مكان اقامته وتترفع له المقشه والشبشب والذي منه
يلا انا لله وانا اليه راجعون
كان طيب والله وكان حنين

الثلاثاء, يناير ١٧, ٢٠٠٦ ٤:٥٧:٠٠ ص  
Blogger Eman M said...

والله يا مالك أنا حاولت كتير أعقله و أقوله نفس كلامك دة، بس تقول إيه بقة :)

الثلاثاء, يناير ١٧, ٢٠٠٦ ١٠:٥٧:٠٠ ص  
Blogger MaLek said...

أزال أحد مشرفي المدونة هذا التعليق.

الثلاثاء, يناير ١٧, ٢٠٠٦ ٢:٥٨:٠٠ م  
Blogger MaLek said...


والله يا ستنا مادام حاولتي تعقليه وهوا مش عايز يعقل
يبقى لا يسعنا ونحن في هذا المصاب الجلل غير ان نقول
انتم السابقون ونحن اللاحقون سلام قوما مؤمنين
اللهم هب له روضه من رياض الجنه ولا تجعله في حفره من حفر النار
والحقنا به على خير
وكلنا في هذه الدنيا عابر سبيل
فاعمل لاخرتك كأنك تتزوج غدا

الثلاثاء, يناير ١٧, ٢٠٠٦ ٣:٠٣:٠٠ م  
Anonymous ezabi said...

سقراط، تشرفنا بالكلمات و باﻹعلان
وعقبال ما نفرح فيكو كلكو كده زي ما فرحتو فينا
مالك، والله دعوة تمام، اهو كده الواحد يتجوز وهو مستريح

الثلاثاء, يناير ١٧, ٢٠٠٦ ٧:١٩:٠٠ م  
Blogger Darsh-Safsata said...

بصراحة يا مالك انا اناني مش بافكر كتير في موضوع المقشة والشبشب
الخوف لا يتسحب منه الكيبورد، هنا تبقى المشكلة
لازم يا ايمان تبقي واخدة بالك ان دي ملكية عامة ممنوع الاعتداء عليها

الثلاثاء, يناير ١٧, ٢٠٠٦ ١١:١٢:٠٠ م  
Blogger عمرو عزت said...

شكرا يا جين علي الزغرودة التدوينية الجامدة دي
اللي جابت كل واحد من مدونته

انا متهيا لي يا مالك تشهل في موضوع لجنة حماية المدونين
احسن فيه كتير باين هايتجوزوا قريب
احنا كده هانروح واحد ورا التاني

الأربعاء, يناير ١٨, ٢٠٠٦ ١:٣٢:٠٠ ص  
Blogger Guevara said...

يللا بالرفاء و البنين

الأربعاء, يناير ١٨, ٢٠٠٦ ٢:٢١:٠٠ ص  
Blogger Alexandra said...

على رأي صديق "هي الناس كانت بتحب بعض أزاي قبل النت" بس بجد ألف مبروك :))

الأربعاء, يناير ١٨, ٢٠٠٦ ٩:٥٩:٠٠ ص  
Blogger Eman M said...

يتسحب منه الكيبورد إزاى بس يا درش، و هى الحياة يبقى ليها طعم من غير كيبورد برضه؟ :)
لو على دى بس، فمتقلقش :)

شكراً ليكم كلكم أوى أوى أوى
و شكر خاص للجميلة سقراط :)

الأربعاء, يناير ١٨, ٢٠٠٦ ١١:٤٣:٠٠ م  
Blogger لـيـلـيـت said...

المهم في ده كله
إن أنا فهمت الأول
إن فيه حاجة جديدة " نظام تدوين يعني "
يجمع بين دروبال وبلوجر
وان المدون والمدون هما اللي عملوا الحاجة التكنولوجية دي

بس الحمد لله ربنا نورني

العزومة ؟؟

الخميس, يناير ١٩, ٢٠٠٦ ٤:٠١:٠٠ ص  
Blogger wa7da_masrya said...

ألف مبروك :) بلا عايزة أشوفكم قريب

الجمعة, يناير ٢٠, ٢٠٠٦ ١:٢٥:٠٠ ص  
Anonymous Jouly said...

MERCI ya Jane 3ashan nawarti el ma7kama ma3lesh ana met2a7'ara awy bas emta7anat ba2a ALF MABROUK ya gama3a 3o2bal el gami3 :) 2oulo AMIN

الجمعة, يناير ٢٠, ٢٠٠٦ ٧:١٠:٠٠ ص  
Blogger Socrates said...

إحححححححححم: عودة من الامتحانات، أول مرة أقرا التعليقات

ضحكت قوي!ا

عايزين بقى جوازة كل أسبوع عشان زوار المدونة يكتروا :)ا

الجمعة, يناير ٢٧, ٢٠٠٦ ١١:٥٢:٠٠ م  
Blogger أبوشنب said...

مبرووووووك

الجمعة, فبراير ٠٣, ٢٠٠٦ ٦:٥٥:٠٠ م  
Blogger daktara said...

اقولك اللي بعده

الثلاثاء, مارس ١٤, ٢٠٠٦ ١٠:٥٨:٠٠ م  

إرسال تعليق

<< Home

<
eXTReMe Tracker
Office Depot Coupon Codes
Office Depot Coupon Codes